ye nawazish ye inayat ye ata rahne de

ye navāzish ye ināyat ye atā rahne de

bas bahut ho chukā ab aur vafā rahne de

merī hastī se ḳhudā ke liye ab aur na khel

ye diyā bujh hī gayā hai to bujhā rahne de

us ne aane ko kahā hai to vo aa.egā zarūr

qasr-e-ummīd kā darvāza khulā rahne de

ai masīhā na abhī kar mire zaḳhmoñ kā ilaaj

aur kuchh roz chaman dil kā khulā rahne de

jī sakūñ jis ke sahāre mire dil par aisā

apnī yādoñ kā koī naqsh banā rahne de

lūTne vaale mirā luuT le sab kuchh lekin

paas mere mirī jāgīr-e-anā rahne de

faisla tere muqaddar kā yahīñ se hogā

sar isī dar pe 'nasīr' apnā jhukā rahne de

ye nawazish ye inayat ye ata rahne de

bas bahut ho chuka ab aur wafa rahne de

meri hasti se KHuda ke liye ab aur na khel

ye diya bujh hi gaya hai to bujha rahne de

us ne aane ko kaha hai to wo aaega zarur

qasr-e-ummid ka darwaza khula rahne de

ai masiha na abhi kar mere zaKHmon ka ilaj

aur kuchh roz chaman dil ka khula rahne de

ji sakun jis ke sahaare mere dil par aisa

apni yaadon ka koi naqsh bana rahne de

luTne wale mera luT le sab kuchh lekin

pas mere meri jagir-e-ana rahne de

faisla tere muqaddar ka yahin se hoga

sar isi dar pe 'nasir' apna jhuka rahne de