یہ نوازش یہ عنایت یہ عطا رہنے دے

یہ نوازش یہ عنایت یہ عطا رہنے دے

بس بہت ہو چکا اب اور وفا رہنے دے

میری ہستی سے خدا کے لئے اب اور نہ کھیل

یہ دیا بجھ ہی گیا ہے تو بجھا رہنے دے

اس نے آنے کو کہا ہے تو وہ آئے گا ضرور

قصر امید کا دروازہ کھلا رہنے دے

اے مسیحا نہ ابھی کر مرے زخموں کا علاج

اور کچھ روز چمن دل کا کھلا رہنے دے

جی سکوں جس کے سہارے مرے دل پر ایسا

اپنی یادوں کا کوئی نقش بنا رہنے دے

لوٹنے والے مرا لوٹ لے سب کچھ لیکن

پاس میرے مری جاگیر انا رہنے دے

فیصلہ تیرے مقدر کا یہیں سے ہوگا

سر اسی در پہ نصیرؔ اپنا جھکا رہنے دے