ye nigah ye munh ye rangat ye misi ye lal-e-KHandan

ye nigah ye muñh ye rangat ye misī ye lāl-e-ḳhandāñ

ġhazab aur tis pe lenā ye zabāñ ba-zer-e-dandāñ

sitam aur naaz ḳhush hai sanamā vale na-chandāñ

ki pare falak se guzrī ye sadā-e-dard-mandāñ

ye namak ye chhap ye saj-dhaj ye adā ko dekh terī

ba-talātum-e-tahayyur hue ġharq hosh-mandāñ

vo latīfā-goī us kī vo fasāhat aur balāġhat

nahīñ is qadar ki bole koī shā.ir-o-suḳhandāñ

falak-ul-burūj par se kaheñ sab malā.ek āmīn

na asar ho kis tarah se ba-duā-e-mustamindāñ

ye nasīb apne dekho ki samajh ke said-e-lāġhar

udhar aan bhī na phaTke kabhī aah said-bandāñ

but-e-sang-dil ḳhudā kā tujhe tars ho jo kuchh bhī

tū shikasta dil ko mat kar ki ye shīsha hai na sandāñ

ba-kamāl-e-fazl-o-dānish ye ba.iid hai ki 'inshā'

ġhalatī pe tū musir ho ba-misāl-e-ḳhud-pasandāñ

ye nigah ye munh ye rangat ye misi ye lal-e-KHandan

ghazab aur tis pe lena ye zaban ba-zer-e-dandan

sitam aur naz KHush hai sanama wale na-chandan

ki pare falak se guzri ye sada-e-dard-mandan

ye namak ye chhap ye saj-dhaj ye ada ko dekh teri

ba-talatum-e-tahayyur hue gharq hosh-mandan

wo latifa-goi us ki wo fasahat aur balaghat

nahin is qadar ki bole koi shair-o-suKHandan

falak-ul-buruj par se kahen sab malaek aamin

na asar ho kis tarah se ba-dua-e-mustamindan

ye nasib apne dekho ki samajh ke said-e-laghar

udhar aan bhi na phaTke kabhi aah said-bandan

but-e-sang-dil KHuda ka tujhe tars ho jo kuchh bhi

tu shikasta dil ko mat kar ki ye shisha hai na sandan

ba-kamal-e-fazl-o-danish ye baid hai ki 'insha'

ghalati pe tu musir ho ba-misal-e-KHud-pasandan