ye nili aanch ya nilam-pari hai

ye niilī aañch yā nīlam-parī hai

havā kī taan par jo jhūmtī hai

mirā kamra misāl-e-dasht-e-vahshat

jahāñ ram-ḳhurda hirnī kho ga.ī hai

uḌā phirtā hai panchhī canvas par

musavvir kī ajab sūrat-garī hai

talab meñ qatra-e-naisāñ kī be-dam

sar-e-sāhil koī siipī paḌī hai

vahāñ thā aaj gul khulne kā imkāñ

jahāñ kal raat hī bijlī girī hai

jahāñ par dhuup din likh kar ga.ī thī

vahāñ ab raat ne kālak malī hai

guzāra is pe bhī kar to rahe haiñ

magar tū hī batā ye zindagī hai

hai is meñ tūl-e-shām-e-ġham kā qissa

jo ye bālisht bhar kī Diary hai

mayassar hai suḳhan-dānoñ kī sohbat

tabhī achchhī ġhazal-kārī huī hai

ye nili aanch ya nilam-pari hai

hawa ki tan par jo jhumti hai

mera kamra misal-e-dasht-e-wahshat

jahan ram-KHurda hirni kho gai hai

uDa phirta hai panchhi canwas par

musawwir ki ajab surat-gari hai

talab mein qatra-e-naisan ki be-dam

sar-e-sahil koi sipi paDi hai

wahan tha aaj gul khulne ka imkan

jahan kal raat hi bijli giri hai

jahan par dhup din likh kar gai thi

wahan ab raat ne kalak mali hai

guzara is pe bhi kar to rahe hain

magar tu hi bata ye zindagi hai

hai is mein tul-e-sham-e-gham ka qissa

jo ye baalisht bhar ki Diary hai

mayassar hai suKHan-danon ki sohbat

tabhi achchhi ghazal-kari hui hai