یہ نظام زندگی بدلا ہے کیا

یہ نظام زندگی بدلا ہے کیا

دیکھتے رہئے ابھی دیکھا ہے کیا

عمر کاٹی ہے سمجھتے بوجھتے

آخرش سمجھا ہے کیا بوجھا ہے کیا

آئنہ بھی دیکھتا ہو آپ کو

یوں بھی آئینہ کبھی دیکھا ہے کیا

جس پہ جاں دینے کی کھاتے ہو قسم

ٹوٹ کر اس کو کبھی چاہا ہے کیا

مانگتے پھرتے ہو سایہ دھوپ سے

کیوں میاں سر پر کوئی سایا ہے کیا

اے کبوتر سر پہ آ پہنچا عقاب

بے خبر مستی میں تو اڑتا ہے کیا

زیب و زیبائش کی خونیں دوڑ میں

کیا ہے زیبا اور نازیبا ہے کیا

دور تک اندھیر ہی اندھیر ہے

لشکر اس جا سے کوئی گزرا ہے کیا

ظلم اب تو قابل اعزاز ہے

زلزلہ پھر شہر میں آنا ہے کیا

جوئے خوں ہے اک تصور میں رواں

جانے اس تقدیر میں لکھا ہے کیا

پھر حیات افروز ہو بزم سخن

ہاں سحرؔ سر میں یہی سودا ہے کیا