یہ نمائش یہ تماشے نہیں اچھے لگتے

یہ نمائش یہ تماشے نہیں اچھے لگتے

ہوں مسائل تو نظارے نہیں اچھے لگتے

سرخ لب سرمئی آنکھیں یہ سنورنا سجنا

مفلسی میں یہ دکھاوے نہیں اچھے لگتے

تو مجھے بھوک بھی سہہ لینے کا عادی کر دے

اب مہاجن کے تقاضے نہیں اچھے لگتے

میری غربت نے مجھے بخشا اندھیروں کا مزاج

ورنہ کس کو یہ اجالے نہیں اچھے لگتے

یہ تو سچ ہے کہ وہ اخلاص سے ملتا ہے بہت

پھر بھی کچھ اس کے ارادے نہیں اچھے لگتے

رت بدلتے ہی ہر اک ذہن بدل جاتا ہے

دھوپ کو روکتے سائے نہیں اچھے لگتے

یہی بہتر ہے کماں نسل جواں کو دے دو

بوڑھے ہاتھوں سے نشانے نہیں اچھے لگتے

میری صدیوں کا بھرم ٹوٹ چکا ہے شہزرؔ

اب یہ ہنستے ہوئے لمحے نہیں اچھے لگتے