ye numaish ye tamashe nahin achchhe lagte

ye numā.ish ye tamāshe nahīñ achchhe lagte

hoñ masā.il to nazāre nahīñ achchhe lagte

surḳh lab surma.ī āñkheñ ye sañvarnā sajnā

muflisī meñ ye dikhāve nahīñ achchhe lagte

tū mujhe bhuuk bhī sah lene kā aadī kar de

ab mahājan ke taqāze nahīñ achchhe lagte

merī ġhurbat ne mujhe baḳhshā añdheroñ kā mizāj

varna kis ko ye ujāle nahīñ achchhe lagte

ye to sach hai ki vo iḳhlās se miltā hai bahut

phir bhī kuchh us ke irāde nahīñ achchhe lagte

rut badalte hī har ik zehn badal jaatā hai

dhuup ko rokte saa.e nahīñ achchhe lagte

yahī behtar hai kamāñ nasl-e-javāñ ko de do

būḌhe hāthoñ se nishāne nahīñ achchhe lagte

merī sadiyoñ kā bharam TuuT chukā hai 'shahzar'

ab ye hañste hue lamhe nahīñ achchhe lagte

ye numaish ye tamashe nahin achchhe lagte

hon masail to nazare nahin achchhe lagte

surKH lab surmai aankhen ye sanwarna sajna

muflisi mein ye dikhawe nahin achchhe lagte

tu mujhe bhuk bhi sah lene ka aadi kar de

ab mahajan ke taqaze nahin achchhe lagte

meri ghurbat ne mujhe baKHsha andheron ka mizaj

warna kis ko ye ujale nahin achchhe lagte

ye to sach hai ki wo iKHlas se milta hai bahut

phir bhi kuchh us ke irade nahin achchhe lagte

rut badalte hi har ek zehn badal jata hai

dhup ko rokte sae nahin achchhe lagte

yahi behtar hai kaman nasl-e-jawan ko de do

buDhe hathon se nishane nahin achchhe lagte

meri sadiyon ka bharam TuT chuka hai 'shahzar'

ab ye hanste hue lamhe nahin achchhe lagte