ye paimana sharab-e-tez se bharne nahin deti

ye paimāna sharāb-e-tez se bharne nahīñ detī

koī shai zindagī meñ hai vahī marne nahīñ detī

ajab kuchh mutma.in rakhtī hai ham ko bekalī dil kī

havā-e-hijr kī yūrish se bhī Darne nahīñ detī

havā-e-barshgāl āḳhir ḳhush aatī hai hameñ lekin

jo ham ne kaam karnā hai vahī karne nahīñ detī

bhaḌaktī hai junūñ kī aag agar koh-o-bayābāñ meñ

koī tohmat havā-e-shahr pe dharne nahīñ detī

liye jaatī hai naḳhl-e-ārzū tak zindagī 'ḳhālid'

magar dāman atā-e-naḳhl se bharne nahīñ detī

ye paimana sharab-e-tez se bharne nahin deti

koi shai zindagi mein hai wahi marne nahin deti

ajab kuchh mutmain rakhti hai hum ko bekali dil ki

hawa-e-hijr ki yurish se bhi Darne nahin deti

hawa-e-barshgal aaKHir KHush aati hai hamein lekin

jo hum ne kaam karna hai wahi karne nahin deti

bhaDakti hai junun ki aag agar koh-o-bayaban mein

koi tohmat hawa-e-shahr pe dharne nahin deti

liye jati hai naKHl-e-arzu tak zindagi 'KHalid'

magar daman ata-e-naKHl se bharne nahin deti