ye piran-e-kalisa-o-haram ai wa-e-majburi

ye pīrān-e-kalīsā-o-haram ai vā-e-majbūrī

sila in kī kad-o-kāvish kā hai sīnoñ kī be-nūrī

yaqīñ paidā kar ai nādāñ yaqīñ se haath aatī hai

vo darveshī ki jis ke sāmne jhuktī hai faġhfūrī

kabhī hairat kabhī mastī kabhī āh-e-sahar-gāhī

badaltā hai hazāroñ rang merā dard-e-mahjūrī

had-e-idrāk se bāhar haiñ bāteñ ishq o mastī kī

samajh meñ is qadar aayā ki dil kī maut hai duurī

vo apne husn kī mastī se haiñ majbūr-e-paidā.ī

mirī āñkhoñ kī bīnā.ī meñ haiñ asbāb-e-mastūrī

koī taqdīr kī mantiq samajh saktā nahīñ varna

na the turkān-e-usmānī se kam turkān-e-taimūrī

faqīrān-e-haram ke haath 'iqbāl' aa gayā kyūñkar

mayassar miir o sultāñ ko nahīñ shāhīn-e-kāfūrī

ye piran-e-kalisa-o-haram ai wa-e-majburi

sila in ki kad-o-kawish ka hai sinon ki be-nuri

yaqin paida kar ai nadan yaqin se hath aati hai

wo darweshi ki jis ke samne jhukti hai faghfuri

kabhi hairat kabhi masti kabhi aah-e-sahar-gahi

badalta hai hazaron rang mera dard-e-mahjuri

had-e-idrak se bahar hain baaten ishq o masti ki

samajh mein is qadar aaya ki dil ki maut hai duri

wo apne husn ki masti se hain majbur-e-paidai

meri aankhon ki binai mein hain asbab-e-masturi

koi taqdir ki mantiq samajh sakta nahin warna

na the turkan-e-usmani se kam turkan-e-taimuri

faqiran-e-haram ke hath 'iqbaal' aa gaya kyunkar

mayassar mir o sultan ko nahin shahin-e-kafuri