یہ پیار یہ خلوص یہ ایثار دیکھ کر

یہ پیار یہ خلوص یہ ایثار دیکھ کر

بھولے گا کون آپ کو اک بار دیکھ کر

گل تک رسائی کوئی بڑی بات تو نہیں

گھبرائیے نہ جادۂ‌ پر خار دیکھ کر

یہ سوچنا غلط ہے کہ منزل نہ پائیں گے

اٹھیں قدم جو وقت کی رفتار دیکھ کر

دیکھا گیا ہے ٹھوکریں کھاتے ہیں وہ ہی لوگ

جو دوڑتے ہیں راہ کو ہموار دیکھ کر

ہم نے کیے گناہ تو رحمت پہ تھی نگاہ

اس کا کرم بھی ہوگا گنہ گار دیکھ کر

گلشنؔ نہ مل سکوں گا زمانے کے ساتھ ساتھ

لگتا یہی ہے زیست کی رفتار دیکھ کر