ye qatra-e-shabnam nahin ai soz-e-jigar aaj

ye qatra-e-shabnam nahīñ ai soz-e-jigar aaj

Duubī huī aa.e hai pasīnoñ meñ sahar aaj

be-vaj.h nahīñ fitrat-e-shoḳhī kā guzar aaj

tum aañkh milā kar jo churāte ho nazar aaj

vo aa.e ayādat ko to aa.ī hai qazā bhī

mehmāñ hue ik vaqt meñ do do mire ghar aaj

armān nikalne diye kis soḳhta-dil kā

hai vasl kī shab bol na ai murġh-e-sahar aaj

vo ka.aba-e-dil toḌte haiñ sañg-e-jafā se

barbād huā jaatā hai allāh kā ghar aaj

har ashk ke dāman meñ hai ik manzar-e-tūfāñ

kyā Duub hī jā.egī ye kashtī-e-nazar aaj

Duubī huī nabzeñ ye pata detī haiñ mujh ko

ai 'auj' na hogī shab-e-furqat kī sahar aaj

ye qatra-e-shabnam nahin ai soz-e-jigar aaj

Dubi hui aae hai pasinon mein sahar aaj

be-wajh nahin fitrat-e-shoKHi ka guzar aaj

tum aankh mila kar jo churaate ho nazar aaj

wo aae ayaadat ko to aai hai qaza bhi

mehman hue ek waqt mein do do mere ghar aaj

arman nikalne diye kis soKHta-dil ka

hai wasl ki shab bol na ai murgh-e-sahar aaj

wo kaba-e-dil toDte hain sang-e-jafa se

barbaad hua jata hai allah ka ghar aaj

har ashk ke daman mein hai ek manzar-e-tufan

kya Dub hi jaegi ye kashti-e-nazar aaj

Dubi hui nabzen ye pata deti hain mujh ko

ai 'auj' na hogi shab-e-furqat ki sahar aaj