ye rahguzar to kisi rahguzar ka dhoka hai

ye rahguzar to kisī rahguzar kā dhokā hai

ki umr bhar kā safar bhī safar kā dhokā hai

ḳhabar kī raushnī ab raushnī nahīñ kartī

so ho na ho ye ḳhabar bhī ḳhabar kā dhokā hai

yahāñ to hadd-e-nazar tak hai ek vīrānī

mire gumāñ ye tujhe kis nagar kā dhokā hai

dikhā.ī bhī to kahīñ de vo dhuup aane par

shajar vo hai ki hamīñ ko shajar kā dhokā hai

isī liye to ye sahrā aziiz hai ki yahāñ

na shor-e-shahr-e-balā hai na ghar kā dhokā hai

badaltī jaatī hai duniyā kuchh is tarah 'ḳhālid'

ki jo nazar meñ hai samjho nazar kā dhokā hai

ye rahguzar to kisi rahguzar ka dhoka hai

ki umr bhar ka safar bhi safar ka dhoka hai

KHabar ki raushni ab raushni nahin karti

so ho na ho ye KHabar bhi KHabar ka dhoka hai

yahan to hadd-e-nazar tak hai ek virani

mere guman ye tujhe kis nagar ka dhoka hai

dikhai bhi to kahin de wo dhup aane par

shajar wo hai ki hamin ko shajar ka dhoka hai

isi liye to ye sahra aziz hai ki yahan

na shor-e-shahr-e-bala hai na ghar ka dhoka hai

badalti jati hai duniya kuchh is tarah 'KHalid'

ki jo nazar mein hai samjho nazar ka dhoka hai