ye rang hai to kahan zabt ka rahega bharam

ye rang hai to kahāñ zabt kā rahegā bharam

na ab vo nāz-e-taġhāful na mujh pe jaur-o-sitam

ye shāḳh-e-gul hai ki dil kī jarāhatoñ kā alam

har ek gul nazar aatā hai zaḳhm-e-be-marham

ġhubār-e-rāh kahīñ hai na koī naqsh-e-qadam

abhī abhī to yahīñ the musāfirān-e-adam

ab aa ga.e haiñ to ādāb-e-mai-kashī kī qasam

bas ek jām-e-rifāqat janāb-e-shaiḳh-e-haram

uThā thā kaun ye mīnā-ba-dosh-o-jām-ba-kaf

ki aaj TuuT ke barsā hai abr-e-be-mausam

kabhī hayā ne kabhī kibr-e-husn ne rokā

rahī to un kī tavajjoh idhar magar kam-kam

magar hai fitrat-e-insāñ meñ āzarī pinhāñ

tarāshtā hai har ik shaḳhs ḳhvāhishoñ ke sanam

unheñ bhī tark-e-ta.alluq kā 'rāz' ġham hai magar

baḌhegī baat agar ho ga.ī vo aañkh bhī nam

ye rang hai to kahan zabt ka rahega bharam

na ab wo naz-e-taghaful na mujh pe jaur-o-sitam

ye shaKH-e-gul hai ki dil ki jarahaton ka alam

har ek gul nazar aata hai zaKHm-e-be-marham

ghubar-e-rah kahin hai na koi naqsh-e-qadam

abhi abhi to yahin the musafiran-e-adam

ab aa gae hain to aadab-e-mai-kashi ki qasam

bas ek jam-e-rifaqat janab-e-shaiKH-e-haram

uTha tha kaun ye mina-ba-dosh-o-jam-ba-kaf

ki aaj TuT ke barsa hai abr-e-be-mausam

kabhi haya ne kabhi kibr-e-husn ne roka

rahi to un ki tawajjoh idhar magar kam-kam

magar hai fitrat-e-insan mein aazari pinhan

tarashta hai har ek shaKHs KHwahishon ke sanam

unhen bhi tark-e-talluq ka 'raaz' gham hai magar

baDhegi baat agar ho gai wo aankh bhi nam