یہ ریگزار جو طوفان و زلزلہ بھی نہیں

یہ ریگزار جو طوفان و زلزلہ بھی نہیں

حسیں خیال کا پودا مگر اگا بھی نہیں

بنا لیا ہے مکاں چھاؤں کے گلستاں میں

مگر سسکتی جواں دھوپ سے جدا بھی نہیں

رہا ہمیشہ وہ حامل کرم نوازی کا

وفا کے شہر سے آنکھیں ملا سکا بھی نہیں

ہر ایک بات نے جس کی قبولیت پائی

کسی سے شہر ستم گر میں آشنا بھی نہیں

اب اس مقام پہ ٹھہرا ہے کاروان حیات

رہ سموم میں راحت فزا ہوا بھی نہیں

برس رہا ہے کہاں سے یہ ٹوٹ کر پانی

کہیں فلک کے نگر میں گھنی گھٹا بھی نہیں

میں چلتا جاتا ہوں بیتابؔ وقت کی صورت

کھلیں گے پھول نگاہوں میں کب پتا بھی نہیں