ye regzar jo tufan-o-zalzala bhi nahin

ye regzār jo tūfān-o-zalzala bhī nahīñ

hasīñ ḳhayāl kā paudā magar ugā bhī nahīñ

banā liyā hai makāñ chhāñv ke gulistāñ meñ

magar sisaktī javāñ dhuup se judā bhī nahīñ

rahā hamesha vo hāmil karam-navāzī kā

vafā ke shahr se āñkheñ milā sakā bhī nahīñ

har ek baat ne jis kī qubūliyat paa.ī

kisī se shahr-e-sitamgar meñ āshnā bhī nahīñ

ab is maqām pe Thahrā hai kārvān-e-hayāt

rah-e-sumūm meñ rāhat-fazā havā bhī nahīñ

baras rahā hai kahāñ se ye Tuut kar paanī

kahīñ falak ke nagar meñ ghanī ghaTā bhī nahīñ

maiñ chaltā jaatā huuñ 'betāb' vaqt kī sūrat

khileñge phuul nigāhoñ meñ kab patā bhī nahīñ

ye regzar jo tufan-o-zalzala bhi nahin

hasin KHayal ka pauda magar uga bhi nahin

bana liya hai makan chhanw ke gulistan mein

magar sisakti jawan dhup se juda bhi nahin

raha hamesha wo hamil karam-nawazi ka

wafa ke shahr se aankhen mila saka bhi nahin

har ek baat ne jis ki qubuliyat pai

kisi se shahr-e-sitamgar mein aashna bhi nahin

ab is maqam pe Thahra hai karwan-e-hayat

rah-e-sumum mein rahat-faza hawa bhi nahin

baras raha hai kahan se ye Tut kar pani

kahin falak ke nagar mein ghani ghaTa bhi nahin

main chalta jata hun 'betab' waqt ki surat

khilenge phul nigahon mein kab pata bhi nahin