ye roz hashr ka aur shikwa-e-wafa ke liye

ye roz hashr kā aur shikva-e-vafā ke liye

ḳhudā ke sāmne to chup raho ḳhudā ke liye

ilāhī vaqt badal de mirī qazā ke liye

jo koste the vo baiThe haiñ ab duā ke liye

bhañvar se naav bache tere bas kī baat nahīñ

ḳhudā pe chhoḌ de ai nāḳhudā ḳhudā ke liye

hamāre vāste marnā to koī baat nahīñ

magar tumheñ na milegā koī vafā ke liye

hazār baar mile vo magar nasīb kī baat

kabhī zabāñ na khulī arz-e-mudda.ā ke liye

koī zarūr hai dīdār-e-āḳhirī meñ naqāb

hazār vaqt paḌe haiñ tirī hayā ke liye

mujhe miTā to rahe ho ma.aal bhī socho

ḳhatā muaaf taras jāoge vafā ke liye

vo jaan kar mujhe tanhā mirī nahīñ sunte

kahāñ se lā.ūñ zamāne ko iltijā ke liye

mire jale hue tinkoñ kī garmiyāñ tauba

khulā huā hai garebān-e-gul havā ke liye

marīz kitnā thā ḳhuddār jaan tak de dī

magar zabāñ na khulī arz-e-mudda.ā ke liye

vo ibtidā-e-mohabbat vo ehtiyāt-e-kalām

banā.e jaate the alfāz iltijā ke liye

zarā marīz-e-mohabbat ko tum bhī dekh aao

ki man.a karte haiñ ab chāragar davā ke liye

'qamar' nahīñ hai vafādār ḳhair yūñhī sahī

huzūr aur koī DhūñDh leñ vafā ke liye

ye roz hashr ka aur shikwa-e-wafa ke liye

KHuda ke samne to chup raho KHuda ke liye

ilahi waqt badal de meri qaza ke liye

jo koste the wo baiThe hain ab dua ke liye

bhanwar se naw bache tere bas ki baat nahin

KHuda pe chhoD de ai naKHuda KHuda ke liye

hamare waste marna to koi baat nahin

magar tumhein na milega koi wafa ke liye

hazar bar mile wo magar nasib ki baat

kabhi zaban na khuli arz-e-muddaa ke liye

koi zarur hai didar-e-aKHiri mein naqab

hazar waqt paDe hain teri haya ke liye

mujhe miTa to rahe ho maal bhi socho

KHata muaf taras jaoge wafa ke liye

wo jaan kar mujhe tanha meri nahin sunte

kahan se laun zamane ko iltija ke liye

mere jale hue tinkon ki garmiyan tauba

khula hua hai gareban-e-gul hawa ke liye

mariz kitna tha KHuddar jaan tak de di

magar zaban na khuli arz-e-muddaa ke liye

wo ibtida-e-mohabbat wo ehtiyat-e-kalam

banae jate the alfaz iltija ke liye

zara mariz-e-mohabbat ko tum bhi dekh aao

ki mana karte hain ab chaaragar dawa ke liye

'qamar' nahin hai wafadar KHair yunhi sahi

huzur aur koi DhunDh len wafa ke liye