ye roz-o-shab milenge kahan dekhte chalen

ye roz-o-shab mileñge kahāñ dekhte chaleñ

aa.e haiñ jab yahāñ to jahāñ dekhte chaleñ

zamzam piyeñ sharāb piyeñ zahr-e-ġham piyeñ

har har nafas kā raqs-e-javāñ dekhte chaleñ

ho jaa.eñ rafta rafta hasīnoñ kī ḳhāk-e-pā

be-nām ho ke nām-o-nishāñ dekhte chaleñ

lahje meñ rañg ruḳh meñ nazar meñ ḳhirām meñ

ik jān-e-jāñ kā lutf-e-nihāñ dekhte chaleñ

āñkhoñ se uñgliyoñ se laboñ se ḳhayāl se

jis jis badan meñ jo hai samāñ dekhte chaleñ

ye jān-o-tan jo piir hue ġham ke bojh se

jaate hue to un ko javāñ dekhte chaleñ

ḳhushbū se jin kī ab bhī mo'attar haiñ bām-o-dar

in bastiyoñ meñ un ke nishāñ dekhte chaleñ

zauq-e-yaqīñ kī husn-e-muravvat kī ġham kī maut

jo kuchh dikhā.e umr-e-ravāñ dekhte chaleñ

khā.eñ fareb roz uThā.eñ naqāb roz

har shaḳhs kyā hai aur kahāñ dekhte chaleñ

maanā ki rā.egāñ hī ga.ī umr-e-be-sabāt

phir bhī hisāb-e-sūd-o-ziyāñ dekhte chaleñ

ye roz-o-shab milenge kahan dekhte chalen

aae hain jab yahan to jahan dekhte chalen

zamzam piyen sharab piyen zahr-e-gham piyen

har har nafas ka raqs-e-jawan dekhte chalen

ho jaen rafta rafta hasinon ki KHak-e-pa

be-nam ho ke nam-o-nishan dekhte chalen

lahje mein rang ruKH mein nazar mein KHiram mein

ek jaan-e-jaan ka lutf-e-nihan dekhte chalen

aankhon se ungliyon se labon se KHayal se

jis jis badan mein jo hai saman dekhte chalen

ye jaan-o-tan jo pir hue gham ke bojh se

jate hue to un ko jawan dekhte chalen

KHushbu se jin ki ab bhi mo'attar hain baam-o-dar

in bastiyon mein un ke nishan dekhte chalen

zauq-e-yaqin ki husn-e-murawwat ki gham ki maut

jo kuchh dikhae umr-e-rawan dekhte chalen

khaen fareb roz uThaen naqab roz

har shaKHs kya hai aur kahan dekhte chalen

mana ki raegan hi gai umr-e-be-sabaat

phir bhi hisab-e-sud-o-ziyan dekhte chalen