ye ruashni-e-taba dikhane ki aarzu

ye ruashnī-e-tab.a dikhāne kī aarzū

achchhī nahīñ balā ko bulāne kī aarzū

jo ġham mile gale se lagāne kī aarzū

rasm-o-rah-e-hayāt nibhāne kī aarzū

ye bhī bhalā hai koī Thikāne ki aarzū

har naqsh-e-ārzū ko miTāne kī aarzū

sahrā ki saḳht dhuup meñ jalte hue badan

bār-e-ġham-e-hayāt uThāne ki aarzū

har zāviye se husn-e-badan dekhne kā shauq

rakhte haiñ log ā.īna-ḳhāne kī aarzū

ye ḳhvāhisheñ ye jehd-e-musalsal ye dauḌ-dhūp

naqsh-o-nigār-e-zīst banāne kī aarzū

apnī shanāḳht ye hai ki ghar hai na dar magar

dīvār-o-dar pe naam likhāne kī aarzū

ye qurbatoñ kī raat ye jalte hue badan

niklegī aaj ek zamāne kī aarzū

badnām ho chukā hai ye fann-e-sharēf bhī

kahne kā shauq hai na sunāne kī aarzū

apnī matā-e-ġham ko liye ham bhī lauT aa.e

har shaḳhs ko thī apnī sunāne kī aarzū

jis haal meñ haiñ sābir-o-shākir haiñ 'tāj' ham

khone kā koī ġham hai na paane kī aarzū

ye ruashni-e-taba dikhane ki aarzu

achchhi nahin bala ko bulane ki aarzu

jo gham mile gale se lagane ki aarzu

rasm-o-rah-e-hayat nibhane ki aarzu

ye bhi bhala hai koi Thikane ki aarzu

har naqsh-e-arzu ko miTane ki aarzu

sahra ki saKHt dhup mein jalte hue badan

bar-e-gham-e-hayat uThane ki aarzu

har zawiye se husn-e-badan dekhne ka shauq

rakhte hain log aaina-KHane ki aarzu

ye KHwahishen ye jehd-e-musalsal ye dauD-dhup

naqsh-o-nigar-e-zist banane ki aarzu

apni shanaKHt ye hai ki ghar hai na dar magar

diwar-o-dar pe nam likhane ki aarzu

ye qurbaton ki raat ye jalte hue badan

niklegi aaj ek zamane ki aarzu

badnam ho chuka hai ye fann-e-shareef bhi

kahne ka shauq hai na sunane ki aarzu

apni mata-e-gham ko liye hum bhi lauT aae

har shaKHs ko thi apni sunane ki aarzu

jis haal mein hain sabir-o-shakir hain 'taj' hum

khone ka koi gham hai na pane ki aarzu