ye sare KHubsurat jism abhi mar jaane wale hain

ye saare ḳhūbsūrat jism abhī mar jaane vaale haiñ

magar ham ishq vaale bhī kahāñ baaz aane vaale haiñ

haqīqat kā hameñ kyā ilm sachchā.ī se kyā matlab

hamāre jitne bhī ma.ashūq haiñ afsāne vaale haiñ

hameñ masjid se kyā jhagḌā magar bas ek mushkil hai

ki us kī or ke sab rāste mai-ḳhāne vaale haiñ

nafī kī sālsī darkār hai jo faisla kar de

ki ham allāh-miyāñ vaale haiñ yā but-ḳhāne vaale haiñ

chalo gumrāhiyoñ kī ruī bhar lo apne kānoñ meñ

sunā hai shaiḳh-sāhab aaj kuchh farmāne vaale haiñ

tum apne jism kā ātish-kada kholo ki ham suufī

usī kī aag le kar ruuh ko garmāne vaale haiñ

agarche 'farhat-ehsās' apnā majnūñ shahr vaalā hai

par us ke ishq ke andāz sab vīrāne vaale haiñ

ye sare KHubsurat jism abhi mar jaane wale hain

magar hum ishq wale bhi kahan baz aane wale hain

haqiqat ka hamein kya ilm sachchai se kya matlab

hamare jitne bhi mashuq hain afsane wale hain

hamein masjid se kya jhagDa magar bas ek mushkil hai

ki us ki or ke sab raste mai-KHane wale hain

nafi ki salsi darkar hai jo faisla kar de

ki hum allah-miyan wale hain ya but-KHane wale hain

chalo gumrahiyon ki rui bhar lo apne kanon mein

suna hai shaiKH-sahab aaj kuchh farmane wale hain

tum apne jism ka aatish-kada kholo ki hum sufi

usi ki aag le kar ruh ko garmane wale hain

agarche 'farhat-ehsas' apna majnun shahr wala hai

par us ke ishq ke andaz sab virane wale hain