ye sari baaten chahat ki yun hi karta rahunga

ye saarī bāteñ chāhat kī yuuñ hī kartā rahūñgā

mohabbat meñ magar kuchh kuchh kamī kartā rahūñgā

mirī nazroñ meñ hai juġhrāfiya us ke badan kā

tasavvur bāñdh lūñgā shā.irī kartā rahūñgā

milegā jab talak mujh ko na vo jān-e-tamannā

maiñ sab kāmoñ ko apne multavī kartā rahūñgā

milūñ jis se ḳhafā do din meñ kar detā huuñ us ko

maiñ āḳhir tā-kujā ye ablahī kartā rahūñgā

tū apnā dil na chhoTā kar lahū hai tan meñ jab tak

maiñ roz-o-shab tirī khetī harī kartā rahūñgā

koī aa.e na kholūñgā maiñ ab darvāza-e-dil

sunūñgā dastakeñ aur an-sunī kartā rahūñgā

junūñ meñ kar ke kuchh us ko dikhānā bhī to hogā

maiñ kab tak us se va.ade kāġhzī kartā rahūñgā

ba-juz kār-e-hunar maiñ kar bhī kyā saktā huuñ 'najmī'

yahī kartā rahā huuñ aur yahī kartā rahūñgā

ye sari baaten chahat ki yun hi karta rahunga

mohabbat mein magar kuchh kuchh kami karta rahunga

meri nazron mein hai jughrafiya us ke badan ka

tasawwur bandh lunga shairi karta rahunga

milega jab talak mujh ko na wo jaan-e-tamanna

main sab kaamon ko apne multawi karta rahunga

milun jis se KHafa do din mein kar deta hun us ko

main aaKHir ta-kuja ye ablahi karta rahunga

tu apna dil na chhoTa kar lahu hai tan mein jab tak

main roz-o-shab teri kheti hari karta rahunga

koi aae na kholunga main ab darwaza-e-dil

sununga dastaken aur an-suni karta rahunga

junun mein kar ke kuchh us ko dikhana bhi to hoga

main kab tak us se wade kaghzi karta rahunga

ba-juz kar-e-hunar main kar bhi kya sakta hun 'najmi'

yahi karta raha hun aur yahi karta rahunga