یہ سب سرود خواب ہے یہ نفع کیا زیان کیا

یہ سب سرود خواب ہے یہ نفع کیا زیان کیا

کمال کیا زوال کیا یقین کیا گمان کیا

ہو فرش تپتی ریت کا یا مخملی لباس ہو

کہ سرپھروں کے واسطے یہ دشت کیا مکان کیا

جو سینہ چیر پھاڑ کر نہ دل کو چیر پھاڑ دے

وہ حسن کیا وہ آنکھ کیا وہ تیر کیا کمان کیا

مری دعا ہے یا خدا مری یہ آس توڑ دے

جو دل کی ترجماں نہ ہو تو منہ میں یہ زبان کیا

ہوں اس کی یاد میں مگن مجھے نہ فلسفے سنا

ثواب کیا عذاب کیا نماز کیا اذان کیا

فصیل زیست پر کھڑا علم لیے نصیب کا

میں خود سے پوچھتا رہا ہے میری آن بان کیا

کلیم میری بات کا جواب اس سے پوچھنا

جو میں تمہارا نور ہوں تو دید کا گمان کیا

کسی کے خواب توڑنے سے پہلے اتنا سوچنا

اجڑ گیا جو باغ ہی کرے گا باغبان کیا