ye sach hai ruh ke andar aqidat sans leti hai

ye sach hai ruuh ke andar aqīdat saañs letī hai

tabhī tahrīr meñ merī shahāmat saañs letī hai

koī nārāz ho jaa.e to aksar sochtī huuñ maiñ

bashar ke dil meñ jaane kyoñ adāvat saañs letī hai

shajar hoñ yā hajar hoñ yā guloñ ke rang hoñ sāhib

havāoñ meñ fazāoñ meñ ye qudrat saañs letī hai

zarā ḳhushiyāñ vahāñ bhī baañT kar tum dekhnā logo

añdheroñ meñ jahāñ ghanghor ġhurbat saañs letī hai

suno gar justujū manzil kī hai to jaan lenā tum

safar ke rāstoñ meñ hī masāfat saañs letī hai

tirī ḳhāmoshiyāñ sāhib baḌī hī jān-levā haiñ

tire hone se hī mujh meñ mohabbat saañs letī hai

anā ke but ko Thokar mārnā hī kāmyābī hai

anā ke but meñ hī sach hai ḳhabāsat saañs letī hai

agar matlab-parastī dil meñ ghar kar le to phir yaaro

diloñ ke darmiyāñ bas ye tijārat saañs letī hai

paḌhegī dil se jab duniyā tujhe ai 'shāz' to sun le

samajh jā.egī tujh meñ kyoñ malāhat saañs letī hai

ye sach hai ruh ke andar aqidat sans leti hai

tabhi tahrir mein meri shahamat sans leti hai

koi naraaz ho jae to aksar sochti hun main

bashar ke dil mein jaane kyon adawat sans leti hai

shajar hon ya hajar hon ya gulon ke rang hon sahib

hawaon mein fazaon mein ye qudrat sans leti hai

zara KHushiyan wahan bhi banT kar tum dekhna logo

andheron mein jahan ghanghor ghurbat sans leti hai

suno gar justuju manzil ki hai to jaan lena tum

safar ke raston mein hi masafat sans leti hai

teri KHamoshiyan sahib baDi hi jaan-lewa hain

tere hone se hi mujh mein mohabbat sans leti hai

ana ke but ko Thokar marna hi kaamyabi hai

ana ke but mein hi sach hai KHabasat sans leti hai

agar matlab-parasti dil mein ghar kar le to phir yaro

dilon ke darmiyan bas ye tijarat sans leti hai

paDhegi dil se jab duniya tujhe ai 'shaz' to sun le

samajh jaegi tujh mein kyon malahat sans leti hai