ye sach nahin hai ki usko meri mohabbaton ki KHabar nahin hai

ye sach nahīñ hai ki us ko merī mohabbatoñ kī ḳhabar nahīñ hai

use pata hai ki 'ishq merā faqat fareb-e-nazar nahīñ hai

sabīh chehre pe raushnī ho agar jo bātin se 'ishq phūTe

tamām duniyā meñ 'ishq jaisā koī bhī kār-e-digar nahīñ hai

jo raah DhūñDe vo raah paa.e jo raah paa.e vo bhuul jaa.e

talāsh kar le jo asl apnī vahī hai jo be-ḳhabar nahīñ hai

savāl sachchā javāb jhūTā jamāl maz.hab ḳhayāl kāfir

atā-e-ishq-e-ajab hai sab kuchh kisī ko is se mafar nahīñ hai

ye 'ishq avval ye 'ishq āḳhir ye 'ishq zāhir ye 'ishq bātin

ki lā meñ pinhāñ haiñ raaz kitne kisī ko koī ḳhabar nahīñ hai

ye 'ishq rasta ye 'ishq manzil ye 'ishq 'aasī ye 'ishq zāhid

diyā hai sidra ke rāste par yahāñ pe sab kā guzar nahīñ hai

nazāra siine se ruuh khīñche hijāb uTThe to aañkh dekhe

haqīqatoñ kā nagar kahe ab agar nahīñ hai magar nahīñ hai

ye sach nahin hai ki us ko meri mohabbaton ki KHabar nahin hai

use pata hai ki 'ishq mera faqat fareb-e-nazar nahin hai

sabih chehre pe raushni ho agar jo baatin se 'ishq phuTe

tamam duniya mein 'ishq jaisa koi bhi kar-e-digar nahin hai

jo rah DhunDe wo rah pae jo rah pae wo bhul jae

talash kar le jo asl apni wahi hai jo be-KHabar nahin hai

sawal sachcha jawab jhuTa jamal mazhab KHayal kafir

ata-e-ishq-e-ajab hai sab kuchh kisi ko is se mafar nahin hai

ye 'ishq awwal ye 'ishq aaKHir ye 'ishq zahir ye 'ishq baatin

ki la mein pinhan hain raaz kitne kisi ko koi KHabar nahin hai

ye 'ishq rasta ye 'ishq manzil ye 'ishq 'asi ye 'ishq zahid

diya hai sidra ke raste par yahan pe sab ka guzar nahin hai

nazara sine se ruh khinche hijab uTThe to aankh dekhe

haqiqaton ka nagar kahe ab agar nahin hai magar nahin hai