ye sach nahin ki tamazat se Dar gai hai nadi

ye sach nahīñ ki tamāzat se Dar ga.ī hai nadī

sukūn-e-dil ke liye apne ghar ga.ī hai nadī

abhī to pahne huī thī libās-e-ḳhāmoshī

ye kyā huā ki achānak biphar ga.ī hai nadī

hameñ ye Dar hai ki phir se biphar na jaa.e kahīñ

qadam baḌhāo ki is vaqt utar ga.ī hai nadī

vo shaḳhs taḌpā na chillāyā aur mar bhī gayā

patā chalā nahīñ kab vaar kar ga.ī hai nadī

nahīñ milī jo rifāqat kisī samundar kī

to reza reza sī ho kar bikhar ga.ī hai nadī

na jaane aaj tū itnī malūl sī kyuuñ hai

ye kyā huā ki tirī aañkh bhar ga.ī hai nadī

sunā sunā ke ġhamoñ kī kahāniyāñ 'firdaus'

mujhe to aur bhī ġhamgīn kar ga.ī hai nadī

ye sach nahin ki tamazat se Dar gai hai nadi

sukun-e-dil ke liye apne ghar gai hai nadi

abhi to pahne hui thi libas-e-KHamoshi

ye kya hua ki achanak biphar gai hai nadi

hamein ye Dar hai ki phir se biphar na jae kahin

qadam baDhao ki is waqt utar gai hai nadi

wo shaKHs taDpa na chillaya aur mar bhi gaya

pata chala nahin kab war kar gai hai nadi

nahin mili jo rifaqat kisi samundar ki

to reza reza si ho kar bikhar gai hai nadi

na jaane aaj tu itni malul si kyun hai

ye kya hua ki teri aankh bhar gai hai nadi

suna suna ke ghamon ki kahaniyan 'firdaus'

mujhe to aur bhi ghamgin kar gai hai nadi