ye samajh ke chalti hun tera naqsh-e-pa hoga

ye samajh ke chaltī huuñ terā naqsh-e-pā hogā

maiñ jahāñ se guzrūñgī terā sāmnā hogā

vaqt kyā batā.egā kaun kis kā qātil hai

apne aap se ik din mujh ko pūchhtā hogā

rūThne se kyā hāsil aap se mohabbat hai

aap jab bhī aa jaa.eñ merā sar jhukā hogā

jis jagah na tum hoge jis jagah na ham hoñge

ek aisī manzil par qāfila rukā hogā

kitne saal biite haiñ ab bhī terī āñkhoñ meñ

kyā ḳhabar thī ashkoñ kā ab bhī silsila hogā

'nāz' apne lahja ko jab bhī log tarseñge

naam mere hoñToñ par sirf aap kā hogā

ye samajh ke chalti hun tera naqsh-e-pa hoga

main jahan se guzrungi tera samna hoga

waqt kya bataega kaun kis ka qatil hai

apne aap se ek din mujh ko puchhta hoga

ruThne se kya hasil aap se mohabbat hai

aap jab bhi aa jaen mera sar jhuka hoga

jis jagah na tum hoge jis jagah na hum honge

ek aisi manzil par qafila ruka hoga

kitne sal bite hain ab bhi teri aankhon mein

kya KHabar thi ashkon ka ab bhi silsila hoga

'naz' apne lahja ko jab bhi log tarsenge

nam mere honTon par sirf aap ka hoga