ye samajhne ki kis ko fursat hai

ye samajhne kī kis ko fursat hai

zindagī maut kī amānat hai

un ko paayā to ye huā mahsūs

jaise mujh ko mirī zarūrat hai

itne jalve qarīb haiñ us ke

jitnī jis kī nazar meñ vus.at hai

āj-kal ham haiñ aur vo manzil

jis meñ har har qadam pe zahmat hai

dūsroñ ke liye fanā ho jaao

yahī me.arāj-e-ādamiyyat hai

is tajāhul se pūchhne ke nisār

kyā hamīñ se tumheñ mohabbat hai

zindagī ġhaflat-e-tamām sahī

maut ta.abīr-e-ḳhvāb-e-ġhaflat hai

zikr masjid meñ mai-kade kā shaiḳh

aap kā dam bahut ġhanīmat hai

jis meñ ho jaa.eñ mehrbāñ vo 'nihāl'

hāsil-e-zindagī vo saa.at hai

ye samajhne ki kis ko fursat hai

zindagi maut ki amanat hai

un ko paya to ye hua mahsus

jaise mujh ko meri zarurat hai

itne jalwe qarib hain us ke

jitni jis ki nazar mein wusat hai

aaj-kal hum hain aur wo manzil

jis mein har har qadam pe zahmat hai

dusron ke liye fana ho jao

yahi mearaj-e-adamiyyat hai

is tajahul se puchhne ke nisar

kya hamin se tumhein mohabbat hai

zindagi ghaflat-e-tamam sahi

maut tabir-e-KHwab-e-ghaflat hai

zikr masjid mein mai-kade ka shaiKH

aap ka dam bahut ghanimat hai

jis mein ho jaen mehrban wo 'nihaal'

hasil-e-zindagi wo saat hai