ye shab-e-furqat mein rang-e-gardish-e-ayyam tha

ye shab-e-furqat meñ rang-e-gardish-e-ayyām thā

sub.h kā taarā jise samjhā charāġh-e-shām thā

ham sunā karte the aksar garmī-e-mahshar kā naam

ab jo dekhā ik sitamgar āftāb-e-bām thā

imtiyāz-e-ishq thā phir kaise lā saktā thā taab

hashr bas is par bapā thā us kā jalva aam thā

ishq par lāzim thā ḳhud farhād kā sar toḌnā

puḳhtagī kā us ko da.avā us ko saudā ḳhaam thā

aap to muḳhtār the jo dil ne chāhā vo kiyā

aur phir ulTā mujhī par hashr meñ ilzām thā

mast saaqī kī nazar kī jumbihsoñ ko kyā kahūñ

ya.anī be-parda javāb-e-gardish-e-ayyām thā

maiñ nasheman meñ rahā sayyād kā yuuñ bhī asiir

dil meñ thā mere qafas āñkhoñ meñ merī daam thā

nāma-bar ko jaan de dī iztirāb-e-shauq meñ

bas yahī naama mirā thā bas yahī paiġhām thā

imtihān-e-ishq us ne kyoñ liyā ai ahl-e-ishq

puḳhta-kāroñ kī taraf se kyā ḳhayāl-e-ḳhām thā

mujh ko jab se hosh hai lākhoñ tarah ke ġham meñ huuñ

hosh meñ jab tak na thā mujh ko bahut ārām thā

kyā 'vafā' kī sarguzisht-e-ġham kahūñ yādash-ba-ḳhair

mar rahā thā aur lab par aap hī kā naam thā

ye shab-e-furqat mein rang-e-gardish-e-ayyam tha

subh ka tara jise samjha charagh-e-sham tha

hum suna karte the aksar garmi-e-mahshar ka nam

ab jo dekha ek sitamgar aaftab-e-baam tha

imtiyaz-e-ishq tha phir kaise la sakta tha tab

hashr bas is par bapa tha us ka jalwa aam tha

ishq par lazim tha KHud farhad ka sar toDna

puKHtagi ka us ko dawa us ko sauda KHam tha

aap to muKHtar the jo dil ne chaha wo kiya

aur phir ulTa mujhi par hashr mein ilzam tha

mast saqi ki nazar ki jumbihson ko kya kahun

yani be-parda jawab-e-gardish-e-ayyam tha

main nasheman mein raha sayyaad ka yun bhi asir

dil mein tha mere qafas aankhon mein meri dam tha

nama-bar ko jaan de di iztirab-e-shauq mein

bas yahi nama mera tha bas yahi paigham tha

imtihan-e-ishq us ne kyon liya ai ahl-e-ishq

puKHta-karon ki taraf se kya KHayal-e-KHam tha

mujh ko jab se hosh hai lakhon tarah ke gham mein hun

hosh mein jab tak na tha mujh ko bahut aaram tha

kya 'wafa' ki sarguzisht-e-gham kahun yaadash-ba-KHair

mar raha tha aur lab par aap hi ka nam tha