ye silsile bhi rifaqat ke kuchh ajib se hain

ye silsile bhī rifāqat ke kuchh ajiib se haiñ

ki duur duur ke manzar bahut qarīb se haiñ

qabā-e-zar hai anā kī agarche zeb-e-badan

magar ye ahl-e-hunar dil ke sab ġharīb se haiñ

yahāñ to sab hī ishāroñ meñ baat karte haiñ

ajiib shahr hai is ke makīñ ajiib se haiñ

maiñ zindagī meñ marūñgī na jaane kitnī baar

mujhe ḳhabar hai ki rishte mire salīb se haiñ

ye aur baat ki us kī chahak se khiltā hai

hazār shikve magar gul ko andalīb se haiñ

use to apnī ḳhabar bhī yahāñ nahīñ miltī

umīdeñ tum ko bahut jis alam-nasīb se haiñ

ye silsile bhi rifaqat ke kuchh ajib se hain

ki dur dur ke manzar bahut qarib se hain

qaba-e-zar hai ana ki agarche zeb-e-badan

magar ye ahl-e-hunar dil ke sab gharib se hain

yahan to sab hi ishaaron mein baat karte hain

ajib shahr hai is ke makin ajib se hain

main zindagi mein marungi na jaane kitni bar

mujhe KHabar hai ki rishte mere salib se hain

ye aur baat ki us ki chahak se khilta hai

hazar shikwe magar gul ko andalib se hain

use to apni KHabar bhi yahan nahin milti

umiden tum ko bahut jis alam-nasib se hain