ye sitare mujhe diwar nahin hone ke

ye sitāre mujhe dīvār nahīñ hone ke

ḳhvāb se ham tire bedār nahīñ hone ke

maiñ ne palkoñ ko bichhāyā hai tire qadmoñ meñ

rāste ab tujhe dushvār nahīñ hone ke

chāhe tū jām-e-baqā dene kā va.ada kar le

ai masīhā tire bīmār nahīñ hone ke

dard-e-kaunain se labrez hoñ jin ke dāman

vo mire ġham ke ḳharīdār nahīñ hone ke

ek hī iiñT pe ham ne jo kiyā hai takiya

ham kabhī sāhab-e-dīvār nahīñ hone ke

chaa.e kī pyālī meñ tūfān uThāne vaalo

ye tamāshe sar-e-bāzār nahīñ hone ke

jaap kar le tū mohabbat ke hazāroñ lekin

tere dushman tire dildār nahīñ hone ke

jin ke sīnoñ meñ gaḌī kufr kī meḳheñ huuñ 'sahar'

vo kabhī diiñ ke vafādār nahīñ hone ke

ye sitare mujhe diwar nahin hone ke

KHwab se hum tere bedar nahin hone ke

main ne palkon ko bichhaya hai tere qadmon mein

raste ab tujhe dushwar nahin hone ke

chahe tu jam-e-baqa dene ka wada kar le

ai masiha tere bimar nahin hone ke

dard-e-kaunain se labrez hon jin ke daman

wo mere gham ke KHaridar nahin hone ke

ek hi inT pe hum ne jo kiya hai takiya

hum kabhi sahab-e-diwar nahin hone ke

chae ki pyali mein tufan uThane walo

ye tamashe sar-e-bazar nahin hone ke

jap kar le tu mohabbat ke hazaron lekin

tere dushman tere dildar nahin hone ke

jin ke sinon mein gaDi kufr ki meKHen hun 'sahar'

wo kabhi din ke wafadar nahin hone ke