ye sitam ki mahfil-e-naz hai kalim isko aur sajae ja

ye sitam kī mahfil-e-nāz hai 'kalīm' is ko aur sajā.e jā

vo dikhā.eñ raqs-e-sitamgarī tū ġhazal kā saaz bajā.e jā

jo akaḌ ke shaan se jaa.e hai pyaar se ye batā.e jā

ki bulandiyoñ kī hai aarzū tū diloñ meñ pahle samā.e jā

vo jo zaḳhm deñ so qubūl hai tire vāste vahī phuul hai

yahī ahl-e-dil kā usuul hai vo rulā.e jaa.eñ tū gaa.e jā

tirā sīdhā sā vo bayān hai tirī TūTī-phūTī zabān hai

tire paas haiñ yahī Thekre tū mahal inhīñ se banā.e jā

vo jafā-shi.ār o sitam-adā tū suḳhan-tarāz o ġhazal-sarā

vo tamām kāñTe ugā.eñge tū tamām phuul khilā.e jā

koī laakh zohra-jabīn hai jise chāheñ ham vo hasīn hai

'kalīm' us sarāpā ġhurūr ko zarā aa.ina to dikhā.e jā

ye sitam ki mahfil-e-naz hai 'kalim' is ko aur sajae ja

wo dikhaen raqs-e-sitamgari tu ghazal ka saz bajae ja

jo akaD ke shan se jae hai pyar se ye batae ja

ki bulandiyon ki hai aarzu tu dilon mein pahle samae ja

wo jo zaKHm den so qubul hai tere waste wahi phul hai

yahi ahl-e-dil ka usul hai wo rulae jaen tu gae ja

tera sidha sa wo bayan hai teri TuTi-phuTi zaban hai

tere pas hain yahi Thekre tu mahal inhin se banae ja

wo jafa-shiar o sitam-ada tu suKHan-taraaz o ghazal-sara

wo tamam kanTe ugaenge tu tamam phul khilae ja

koi lakh zohra-jabin hai jise chahen hum wo hasin hai

'kalim' us sarapa ghurur ko zara aaina to dikhae ja