ye sochna bhi ghalat hai ki dil-nashin hai bahut

ye sochnā bhī ġhalat hai ki dil-nashīñ hai bahut

kamāl-e-duniyā to itnā hai be-yaqīñ hai bahut

kahīñ jhulas hī na jaa.e ġhubār yādoñ kā

ki mere ḳhuun kī raftār ātishīñ hai bahut

gumān hone lagā hai ye kis ke hone par

kahīñ kahīñ jo nahīñ hai kahīñ kahīñ hai bahut

shikast khaa.ī hai lekin shikasta-pā to nahīñ

hamāre paañv ke nīche abhī zamīñ hai bahut

bikher de na kahīñ phir matā’-e-dīda-o-dil

vo ek ḳhvāb jo āñkhoñ meñ jāguzīñ hai bahut

zarar-risāñ na huā kuchh mirā ġhanīm magar

kise ḳhabar thī ki mujh ko ye āstīñ hai bahut

hamārā dil bhī dikhātā hai nit-na.e kartab

tumhārā dil bhī to shāyad tamāsh-bīñ hai bahut

ye sochna bhi ghalat hai ki dil-nashin hai bahut

kamal-e-duniya to itna hai be-yaqin hai bahut

kahin jhulas hi na jae ghubar yaadon ka

ki mere KHun ki raftar aatishin hai bahut

guman hone laga hai ye kis ke hone par

kahin kahin jo nahin hai kahin kahin hai bahut

shikast khai hai lekin shikasta-pa to nahin

hamare panw ke niche abhi zamin hai bahut

bikher de na kahin phir mata’-e-dida-o-dil

wo ek KHwab jo aankhon mein jaguzin hai bahut

zarar-risan na hua kuchh mera ghanim magar

kise KHabar thi ki mujh ko ye aastin hai bahut

hamara dil bhi dikhata hai nit-nae kartab

tumhaara dil bhi to shayad tamash-bin hai bahut