ye subh-o-sham meri hai na saz-o-raKHt mera

ye sub.h-o-shām mirī hai na sāz-o-raḳht mirā

hai koī aur jo kartā hai bandobast mirā

dimāġh-e-sair-e-nafas soz-o-sāz-e-ranj-o-nishāt

miyān-e-bīm-o-rajā hai ye būd-o-hast mirā

mujhe hai zarra-e-ḳhākī bhī matla-e-gardūñ

buland-bīñ hai ḳhayāl-e-buland-o-past mirā

mire fasāne meñ yazdāñ bhī ahrman bhī magar

vo DhūñDhtā rahā unvān-e-sarguzasht mirā

ye laḌkhaḌāte sitāre ye jū-e-mast-e-ḳhirām

bikhar rahā hai ḳhayāl-e-junūñ-parast mirā

mire nadīm-e-dil-o-jāñ pe khusravī taslīm

shahī asā-e-dil-ārā kī tāj-o-taḳht mirā

falak-numā thā jamāl-e-ġhazāl ram-ḳhurda

usī ke saath gayā āsmān-e-baḳht mirā

na jaane kyuuñ use sach nāgavār guzrā hai

ki dil-navāz thā lahja na thā karaḳht mirā

ye subh-o-sham meri hai na saz-o-raKHt mera

hai koi aur jo karta hai bandobast mera

dimagh-e-sair-e-nafas soz-o-saz-e-ranj-o-nishat

miyan-e-bim-o-raja hai ye bud-o-hast mera

mujhe hai zarra-e-KHaki bhi matla-e-gardun

buland-bin hai KHayal-e-buland-o-past mera

mere fasane mein yazdan bhi ahrman bhi magar

wo DhunDhta raha unwan-e-sarguzasht mera

ye laDkhaDate sitare ye ju-e-mast-e-KHiram

bikhar raha hai KHayal-e-junun-parast mera

mere nadim-e-dil-o-jaan pe khusrawi taslim

shahi asa-e-dil-ara ki taj-o-taKHt mera

falak-numa tha jamal-e-ghazal ram-KHurda

usi ke sath gaya aasman-e-baKHt mera

na jaane kyun use sach nagawar guzra hai

ki dil-nawaz tha lahja na tha karaKHt mera