ye surmai fazaon ki kunmunahaTen

ye surma.ī fazāoñ kī kunmunāhaTeñ

miltī haiñ mujh ko pichhle pahar terī āhaTeñ

is kā.enāt-e-ġham kī fasurda fazāoñ meñ

bikhrā ga.e haiñ aa ke vo kuchh muskurāhaTeñ

ai jism-e-nāznīn-e-nigār-e-nazar-navāz

sub.h-e-shab-e-visāl terī malgujāhaTeñ

paḌtī hai āsmān-e-mohabbat pe chhūT sī

balbe jabīn-e-nāz tirī jagmagāhaTeñ

chaltī hai jab nasīm-e-ḳhayāl-e-ḳhirām-e-nāz

suntā huuñ dāmanoñ kī tire sarsarāhaTeñ

chashm-e-siyah tabassum-e-pinhāñ liye hue

pau phūTne se qabl ufuq kī adāhateñ

jumbish meñ jaise shāḳh ho gul-hā-e-naġhma kī

ik paikar-e-jamīl kī ye lahlahāhaTeñ

jhoñkoñ kī nazr hai chaman-e-intizār-e-dost

yād-e-ummīd-o-bīm kī ye sansanāhaTeñ

ho sāmnā agar to ḳhajil ho nigāh-e-barq

dekhī haiñ uzv uzv meñ vo achpalāhaTeñ

kis des ko sidhār ga.iiñ ai jamāl-e-yār

rañgīñ laboñ pe khel ke kuchh muskurāhaTeñ

ruḳhsār-e-tar se taaza ho bāġh-e-adan kī yaad

aur us kī pahlī sub.h kī vo rasmasāhaTeñ

sāz-e-jamāl kī ye navā-hā-e-sarmadī

joban to vo farishte suneñ gungunāhaTeñ

āzurdagī-e-husn bhī kis darja shoḳh hai

ashkoñ meñ tairtī huī kuchh muskurāhaTeñ

hone lagā huuñ ḳhud se qarīñ ai shab-e-alam

maiñ pā rahā huuñ hijr meñ kuchh apnī āhaTeñ

merī ġhazal kī jaan samajhnā unheñ 'firāq'

sham-e-ḳhayāl-e-yār kī ye thartharāhaTeñ

ye surmai fazaon ki kunmunahaTen

milti hain mujh ko pichhle pahar teri aahaTen

is kaenat-e-gham ki fasurda fazaon mein

bikhra gae hain aa ke wo kuchh muskurahaTen

ai jism-e-naznin-e-nigar-e-nazar-nawaz

subh-e-shab-e-visal teri malgujahaTen

paDti hai aasman-e-mohabbat pe chhuT si

balbe jabin-e-naz teri jagmagahaTen

chalti hai jab nasim-e-KHayal-e-KHiram-e-naz

sunta hun damanon ki tere sarsarahaTen

chashm-e-siyah tabassum-e-pinhan liye hue

pau phuTne se qabl ufuq ki adahaten

jumbish mein jaise shaKH ho gul-ha-e-naghma ki

ek paikar-e-jamil ki ye lahlahahaTen

jhonkon ki nazr hai chaman-e-intizar-e-dost

yaad-e-ummid-o-bim ki ye sansanahaTen

ho samna agar to KHajil ho nigah-e-barq

dekhi hain uzw uzw mein wo achpalahaTen

kis des ko sidhaar gain ai jamal-e-yar

rangin labon pe khel ke kuchh muskurahaTen

ruKHsar-e-tar se taza ho bagh-e-adan ki yaad

aur us ki pahli subh ki wo rasmasahaTen

saz-e-jamal ki ye nawa-ha-e-sarmadi

joban to wo farishte sunen gungunahaTen

aazurdagi-e-husn bhi kis darja shoKH hai

ashkon mein tairti hui kuchh muskurahaTen

hone laga hun KHud se qarin ai shab-e-alam

main pa raha hun hijr mein kuchh apni aahaTen

meri ghazal ki jaan samajhna unhen 'firaq'

sham-e-KHayal-e-yar ki ye thartharahaTen