ye taDap hai lazzat-e-zindagi ye KHalish nahin to maza nahin

ye taḌap hai lazzat-e-zindagī ye ḳhalish nahīñ to mazā nahīñ

maiñ huuñ fitratan alam-āshnā mire dukh kī koī davā nahīñ

yūñhī vāqi.āt ke zail meñ kahīñ terā naam bhī aa gayā

mirī hasratoñ kā thā tazkira tirī be-ruḳhī kā gila nahīñ

mirī shustagī-e-mazāq ne mujhe har balā se bachā liyā

maiñ junūñ kī zad meñ na aa sakā maiñ hadaf ḳhirad kā banā nahīñ

mirā zauq ḳhud mirā rāhbar mirā shauq ḳhud mirā rahnumā

use ho zarūrat-e-nā-ḳhudā jise e'timād-e-ḳhudā nahīñ

abhī aur talḳhī-e-soz ko zarā rang-e-naġhma-e-sāz de

jo mizāj-e-husn pe baar hoñ yahāñ aise ashk ravā nahīñ

maiñ 'shafīq' hasrat-o-yās-o-ġham ke na gā.ūñ giit to kyā karūñ

koī sāz-e-aish-o-tarab nahīñ koī dil-navāz sadā nahīñ

ye taDap hai lazzat-e-zindagi ye KHalish nahin to maza nahin

main hun fitratan alam-ashna mere dukh ki koi dawa nahin

yunhi waqiat ke zail mein kahin tera nam bhi aa gaya

meri hasraton ka tha tazkira teri be-ruKHi ka gila nahin

meri shustagi-e-mazaq ne mujhe har bala se bacha liya

main junun ki zad mein na aa saka main hadaf KHirad ka bana nahin

mera zauq KHud mera rahbar mera shauq KHud mera rahnuma

use ho zarurat-e-na-KHuda jise e'timad-e-KHuda nahin

abhi aur talKHi-e-soz ko zara rang-e-naghma-e-saz de

jo mizaj-e-husn pe bar hon yahan aise ashk rawa nahin

main 'shafiq' hasrat-o-yas-o-gham ke na gaun git to kya karun

koi saz-e-aish-o-tarab nahin koi dil-nawaz sada nahin