ye tajraba bhi hai humne faqat suna hi nahin

ye tajraba bhī hai ham ne faqat sunā hī nahīñ

gumān shauq se baḌh kar yaqīñ huā hī nahīñ

havā hai tez to ho bādbāñ khule hī raheñ

ḳhudā bhī hai mire hamrāh nāḳhudā hī nahīñ

ye aur baat añdhere haiñ merī āñkhoñ meñ

charāġh-e-dil to kisī daur meñ bujhā hī nahīñ

chamakne vaale sitāre bahut ġhanīmat haiñ

ye ġham-gusār bhī haiñ dard-āshnā hī nahīñ

ham un kī baat ko phir aaj mo'atabar jāneñ

ki jī bahalne kā ab aur rāsta hī nahīñ

bulandiyoñ hī pe aksar hameñ nazar aaya

magar vo shaḳhs kabhī shahr meñ milā hī nahīñ

fazā meñ kitne ḳhayāloñ kī gard uḌtī hai

'rabāb' ab koī ye baat sochtā hī nahīñ

ye tajraba bhi hai hum ne faqat suna hi nahin

guman shauq se baDh kar yaqin hua hi nahin

hawa hai tez to ho baadban khule hi rahen

KHuda bhi hai mere hamrah naKHuda hi nahin

ye aur baat andhere hain meri aankhon mein

charagh-e-dil to kisi daur mein bujha hi nahin

chamakne wale sitare bahut ghanimat hain

ye gham-gusar bhi hain dard-ashna hi nahin

hum un ki baat ko phir aaj mo'atabar jaanen

ki ji bahalne ka ab aur rasta hi nahin

bulandiyon hi pe aksar hamein nazar aaya

magar wo shaKHs kabhi shahr mein mila hi nahin

faza mein kitne KHayalon ki gard uDti hai

'rabab' ab koi ye baat sochta hi nahin