ye tamanna hai ki main harf-e-wafa ho jaun

ye tamanna hai ki maiñ harf-e-vafā ho jā.ūñ

merī bāteñ raheñ be-shak maiñ fanā ho jā.ūñ

mere kirdār se achchhā.ī kī ḳhushbū aa.e

har burā.ī ke liye maiñ to burā ho jā.ūñ

sab ko bedār karūñ om kī āvāz se maiñ

vo jo aatī hai azaañ se vo sadā ho jā.ūñ

jis meñ tahzīboñ ke gul saath khilā karte the

phir mire mulk kī vo āb-o-havā ho jā.ūñ

vo jo hijrat ke sabab chhoḌ ga.e haiñ ghar ko

unhī bichhḌe hue apnoñ kā pata ho jā.ūñ

isī ummīd pe din kaaT diye haiñ maiñ ne

zindagī maiñ tirī rātoñ kā diyā ho jā.ūñ

ruuTh kar phir se chhupūñ ghar ke kisī kone meñ

ik khilaune ke liye sab se ḳhafā ho jā.ūñ

jo mujhe chhoḌ ke jaate haiñ vo panchhī sun leñ

kal na.ī rut meñ phaloñ se na ladā ho jā.ūñ

ret ke ghar jo banāte haiñ yahāñ sāhil par

unhī ma.asūm se bachchoñ kī duā ho jā.ūñ

ye tamanna hai ki main harf-e-wafa ho jaun

meri baaten rahen be-shak main fana ho jaun

mere kirdar se achchhai ki KHushbu aae

har burai ke liye main to bura ho jaun

sab ko bedar karun om ki aawaz se main

wo jo aati hai azan se wo sada ho jaun

jis mein tahzibon ke gul sath khila karte the

phir mere mulk ki wo aab-o-hawa ho jaun

wo jo hijrat ke sabab chhoD gae hain ghar ko

unhi bichhDe hue apnon ka pata ho jaun

isi ummid pe din kaT diye hain main ne

zindagi main teri raaton ka diya ho jaun

ruTh kar phir se chhupun ghar ke kisi kone mein

ek khilaune ke liye sab se KHafa ho jaun

jo mujhe chhoD ke jate hain wo panchhi sun len

kal nai rut mein phalon se na lada ho jaun

ret ke ghar jo banate hain yahan sahil par

unhi masum se bachchon ki dua ho jaun