ye tamanna thi ki hum itne suKHanwar hote

ye tamannā thī ki ham itne suḳhanvar hote

ik ġhazal kahte to ābād ka.ī ghar hote

dūriyāñ itnī diloñ meñ to na hotīñ yārab

phail jaate ye jazīre to samundar hote

apne hāthoñ pe muqaddar ke navishte bhī paḌh

na sahī mā'nī zarā lafz to behtar hote

dil pe ik vah.y aur ilhām kā rahtā hai samāñ

ham agar rind na hote to payambar hote

ham agar dil na jalāte to na jalte ye charāġh

ham na rote jo lahū aa.ine meñ patthar hote

ham agar jām-ba-kaf raqs na karte rahte

terī rāhoñ meñ sitāre na gul-e-tar hote

ghar banā baiThe bayābāñ meñ divāne varna

paañv uTh jaate to jibrīl kā shahpar hote

sūrateñ yuuñ to na yāroñ kī rulātī rahtīñ

ai ġham-e-marg ye sadme to na dil par hote

ham rahe garche tahī-dast hī jāfar-'tāhir'

bas meñ ye baat bhī kab thī ki abūzar hote

ye tamanna thi ki hum itne suKHanwar hote

ek ghazal kahte to aabaad kai ghar hote

duriyan itni dilon mein to na hotin yarab

phail jate ye jazire to samundar hote

apne hathon pe muqaddar ke nawishte bhi paDh

na sahi ma'ni zara lafz to behtar hote

dil pe ek wahy aur ilham ka rahta hai saman

hum agar rind na hote to payambar hote

hum agar dil na jalate to na jalte ye charagh

hum na rote jo lahu aaine mein patthar hote

hum agar jam-ba-kaf raqs na karte rahte

teri rahon mein sitare na gul-e-tar hote

ghar bana baiThe bayaban mein diwane warna

panw uTh jate to jibril ka shahpar hote

suraten yun to na yaron ki rulati rahtin

ai gham-e-marg ye sadme to na dil par hote

hum rahe garche tahi-dast hi jafar-'tahir'

bas mein ye baat bhi kab thi ki abuzar hote