ye tamkanat ye takabbur ye shan rahne do

ye tamkanat ye takabbur ye shaan rahne do

jo hai tumhāre bharam kā makān rahne do

savāl-e-umr na pesh aa.e nek maqsad meñ

irāde apne hamesha javān rahne do

inhīñ ko dekh ke pahuñchegī nasl manzil tak

har ik qadam pe lahū ke nishān rahne de

havā kā ruḳh ho muāfiq ye intizār karo

abhī lapeTe hue bādbān rahne do

ḳhushī ke saath uḌaao gulāl sū-e-falak

magar ye sun lo zamīñ par amaan rahne do

kisī kī baat sukūñ kā sabab hai ai 'shādāñ'

mirī zabāñ pe ye ik dāstān rahne do

ye tamkanat ye takabbur ye shan rahne do

jo hai tumhaare bharam ka makan rahne do

sawal-e-umr na pesh aae nek maqsad mein

irade apne hamesha jawan rahne do

inhin ko dekh ke pahunchegi nasl manzil tak

har ek qadam pe lahu ke nishan rahne de

hawa ka ruKH ho muafiq ye intizar karo

abhi lapeTe hue baadban rahne do

KHushi ke sath uDao gulal su-e-falak

magar ye sun lo zamin par aman rahne do

kisi ki baat sukun ka sabab hai ai 'shadan'

meri zaban pe ye ek dastan rahne do