ye tarz-e-takallum hai tera ham-nafasan se

ye tarz-e-takallum hai tirā ham-nafasāñ se

tū dekh rahā hai nazar-e-sūd-o-ziyāñ se

tahqīr mirī is se sivā bazm meñ kyā ho

maiñ tujh se muḳhātib tū fulāñ-ibn-e-fulāñ se

kyā ma.arka-e-tūr bapā hone lagā hai

ik sho.ala lapaktā hai mire qalb-e-tapāñ se

mai-ḳhāna-e-ajmer se vo rañg hai mafqūd

ab shikva mujhe kuchh bhī nahīñ pīr-e-muġhāñ se

farhād kī masnad pe agar baiThnā chāhe

phir soch kī buniyād uThā koh-e-girāñ se

hañste hue karnā hai rafū zaḳhm-e-jigar kā

kuchh kaam nahīñ bantā yahāñ āh-o-fuġhāñ se

shā.ir huuñ marūñgā to kisī Dhab se marūñgā

ai dost koī rail guzartī hai yahāñ se

ye tarz-e-takallum hai tera ham-nafasan se

tu dekh raha hai nazar-e-sud-o-ziyan se

tahqir meri is se siwa bazm mein kya ho

main tujh se muKHatib tu fulan-ibn-e-fulan se

kya marka-e-tur bapa hone laga hai

ek shoala lapakta hai mere qalb-e-tapan se

mai-KHana-e-ajmer se wo rang hai mafqud

ab shikwa mujhe kuchh bhi nahin pir-e-mughan se

farhad ki masnad pe agar baiThna chahe

phir soch ki buniyaad uTha koh-e-giran se

hanste hue karna hai rafu zaKHm-e-jigar ka

kuchh kaam nahin banta yahan aah-o-fughan se

shair hun marunga to kisi Dhab se marunga

ai dost koi rail guzarti hai yahan se