ye tere hijr ka mausam sarab jaisa hai

ye tere hijr kā mausam sarāb jaisā hai

har ek lamha musalsal azaab jaisā hai

laboñ pe us ke tabassum ke phuul khilte haiñ

vo ek chehra mo.attar gulāb jaisā hai

kisī ne jaam uThāyā kisī kī zulf khulī

havā ke dosh pe mausam sahāb jaisā hai

ba-nām-e-lāla-ruḳhāñ kuchh to zahr-e-ġham pī leñ

tire laboñ meñ halāhil sharāb jaisā hai

vo mere paas hai lekin ye haal hai apnā

sukūn dil kā bhī ab iztirāb jaisā hai

qarār-e-jāñ bhī vahī iztirāb-e-jāñ bhī vahī

vo ek shaḳhs mujassam-shabāb jaisā hai

ḳhalish hai dil meñ kasak sī hai bekalī bhī hai

'sabā' ye hosh kā aalam bhī ḳhvāb jaisā hai

ye tere hijr ka mausam sarab jaisa hai

har ek lamha musalsal azab jaisa hai

labon pe us ke tabassum ke phul khilte hain

wo ek chehra moattar gulab jaisa hai

kisi ne jam uThaya kisi ki zulf khuli

hawa ke dosh pe mausam sahab jaisa hai

ba-nam-e-lala-ruKHan kuchh to zahr-e-gham pi len

tere labon mein halahil sharab jaisa hai

wo mere pas hai lekin ye haal hai apna

sukun dil ka bhi ab iztirab jaisa hai

qarar-e-jaan bhi wahi iztirab-e-jaan bhi wahi

wo ek shaKHs mujassam-shabab jaisa hai

KHalish hai dil mein kasak si hai bekali bhi hai

'saba' ye hosh ka aalam bhi KHwab jaisa hai