ye to malum ki phir aaiyega

ye to ma.alūm ki phir ā.iyegā

baiThiye aaj kahāñ jā.iyegā

marqad-e-kushta pe jab ā.iyegā

dil meñ kuchh soch ke pachhtā.iyegā

ham to samjhe the ki jald ā.iyegā

ḳhair ab pūchh ke ghar jā.iyegā

ġhair ko bose dahan ke kaise

kuchh mirā muñh to na khulvā.iyegā

mere kahne meñ nahīñ hai dil-e-zār

aap hī kuchh use samjhā.iyegā

ab to chūse lab-e-shīrīñ ham ne

lo hameñ ghol ke pī jā.iyegā

daulat-e-vasl hai qīmat dil kī

aage kuchh aap bhī farmā.iyegā

jam.a ḳhātir rahiye ai ahl-e-qubūr

ham bhī aate haiñ na ghabrā.iyegā

vasf likhte haiñ lab-e-shīrīñ ke

kuchh miThā.ī hameñ khilvā.iyegā

naza.a meñ paas mire kyuuñ baiThe

uThiye uThiye nahīñ ghabrā.iyegā

sadma-e-hijr meñ taklīf kareñ

malak-ul-maut se farmā.iyegā

aap par marne se hāsil kyā hai

fātiha bhī to na divā.iyegā

shaiḳh-jī but kī burā.ī kiije

apne allāh se bharpā.iyegā

ka.abe meñ saḳht-kalāmī sun lī

but-kade meñ na kabhī ā.iyegā

bose lillāh 'saḳhī' māñgtā hai

ek dījegā to das pā.iyegā

ye to malum ki phir aaiyega

baiThiye aaj kahan jaiyega

marqad-e-kushta pe jab aaiyega

dil mein kuchh soch ke pachhtaiyega

hum to samjhe the ki jald aaiyega

KHair ab puchh ke ghar jaiyega

ghair ko bose dahan ke kaise

kuchh mera munh to na khulwaiyega

mere kahne mein nahin hai dil-e-zar

aap hi kuchh use samjhaiyega

ab to chuse lab-e-shirin hum ne

lo hamein ghol ke pi jaiyega

daulat-e-wasl hai qimat dil ki

aage kuchh aap bhi farmaiyega

jama KHatir rahiye ai ahl-e-qubur

hum bhi aate hain na ghabraiyega

wasf likhte hain lab-e-shirin ke

kuchh miThai hamein khilwaiyega

naza mein pas mere kyun baiThe

uThiye uThiye nahin ghabraiyega

sadma-e-hijr mein taklif karen

malak-ul-maut se farmaiyega

aap par marne se hasil kya hai

fatiha bhi to na diwaiyega

shaiKH-ji but ki burai kije

apne allah se bharpaiyega

kabe mein saKHt-kalami sun li

but-kade mein na kabhi aaiyega

bose lillah 'saKHi' mangta hai

ek dijega to das paiyega