ye tum har baat lafzon ki zabani kyun samajhte ho

ye tum har baat lafzoñ kī zabānī kyuuñ samajhte ho

sukūt-e-lab ko āḳhir be-ma.ānī kyuuñ samajhte ho

ye mumkin hai yahīñ tak ho tumhārī tāb-e-bīnā.ī

nazar kī had ko āḳhir be-karānī kyuuñ samajhte ho

agar sach hai tumhārī maut kā ik din muayyan hai

to phir is tai-shuda ko nā-gahānī kyuuñ samajhte ho

yaqīñ rakkho samundar kī saḳhāvat par yaqīñ rakkho

hamesha ḳhālī haath aa.egā paanī kyuuñ samajhte ho

ye mumkin hai tumhārā aks hī barham ho chehre se

ise tum aa.ine kī sargirānī kyuuñ samajhte ho

mire ash.ār meñ jo dard kī shiddat hai merī hai

mire ehsās ko apnī kahānī kyuuñ samajhte ho

yahāñ zāhir kā chehrā muḳhtalif hotā hai bātin se

khilī rañgat ko dil kī shādmānī kyuuñ samajhte ho

ye tum har baat lafzon ki zabani kyun samajhte ho

sukut-e-lab ko aaKHir be-maani kyun samajhte ho

ye mumkin hai yahin tak ho tumhaari tab-e-binai

nazar ki had ko aaKHir be-karani kyun samajhte ho

agar sach hai tumhaari maut ka ek din muayyan hai

to phir is tai-shuda ko na-gahani kyun samajhte ho

yaqin rakkho samundar ki saKHawat par yaqin rakkho

hamesha KHali hath aaega pani kyun samajhte ho

ye mumkin hai tumhaara aks hi barham ho chehre se

ise tum aaine ki sargirani kyun samajhte ho

mere ashaar mein jo dard ki shiddat hai meri hai

mere ehsas ko apni kahani kyun samajhte ho

yahan zahir ka chehra muKHtalif hota hai baatin se

khili rangat ko dil ki shadmani kyun samajhte ho