ye uruj-e-hasti hai ya zawal-e-hasti hai

ye urūj-e-hastī hai yā zavāl-e-hastī hai

un kī aarzū mahñgī apnī maut sastī hai

khul chuke haiñ rindoñ par rāz-hā-e-mai-ḳhāna

ḳhud nigāh-e-sāqī se tishnagī barastī hai

duur tak nahīñ koī saath dasht-e-ġhurbat meñ

rāstoñ kī vīrānī aur dil ko Dastī hai

kuchh to ai ġham-e-jānāñ tujh ko bhūlnā hogā

sirf terā ho rahnā ik buland pastī hai

ik tujhī ko chāhā thā kyā ḳhudā.ī chāhī thī

phir bhī kam-nazar duniyā jurm-e-dil pe hañstī hai

kal unhīñ kī peshānī sub.h-e-nau jagā.egī

jin kī tīra-baḳhtī par aaj raat hañstī hai

dil 'mujīb' aise meñ Duub Duub jaatā hai

jab nigāh-e-dushman se dostī barastī hai

ye uruj-e-hasti hai ya zawal-e-hasti hai

un ki aarzu mahngi apni maut sasti hai

khul chuke hain rindon par raaz-ha-e-mai-KHana

KHud nigah-e-saqi se tishnagi barasti hai

dur tak nahin koi sath dasht-e-ghurbat mein

raston ki virani aur dil ko Dasti hai

kuchh to ai gham-e-jaanan tujh ko bhulna hoga

sirf tera ho rahna ek buland pasti hai

ek tujhi ko chaha tha kya KHudai chahi thi

phir bhi kam-nazar duniya jurm-e-dil pe hansti hai

kal unhin ki peshani subh-e-nau jagaegi

jin ki tira-baKHti par aaj raat hansti hai

dil 'mujib' aise mein Dub Dub jata hai

jab nigah-e-dushman se dosti barasti hai