ye waiz kaisi bahki bahki baaten humse karte hain

ye vaa.iz kaisī bahkī bahkī bāteñ ham se karte haiñ

kahīñ chaḌh kar sharāb-e-ishq ke nashshe utarte haiñ

ḳhudā samjhe ye kyā sayyād o gulchīñ zulm karte haiñ

guloñ ko toḌte haiñ bulbuloñ ke par katarte haiñ

dayā dam naza.a meñ go aap ne par ruuh chal niklī

kisī ke rokne se jaane vaale kab Thaharte haiñ

zarā rahne do apne dar pe ham ḳhāna-ba-doshoñ ko

musāfir jis jagah ārām paate haiñ Thaharte haiñ

na aa jaayā karo aġhyār kī ulfat jatāne meñ

vo tum par kyuuñ bhalā marne lage fāqoñ se marte haiñ

har ik mausam meñ kisht-e-ārzū sarsabz rahtī hai

taraddud ġhair ko hogā yahāñ to chain karte haiñ

ye joḌā kholnā bhī hech se ḳhālī nahīñ un kā

ulajh jaatā hai dil jab baal shānoñ par bikharte haiñ

samajh lenā tumhārā ai raqībo kuchh nahīñ mushkil

ḳhudā jaane ye kis kā ḳhauf hai ham kis se Darte haiñ

takalluf ke ye ma.anī haiñ samajh lo be-kahe dil kī

mazā kyā jab hamīñ ne ye kahā tum se ki marte haiñ

ye waiz kaisi bahki bahki baaten hum se karte hain

kahin chaDh kar sharab-e-ishq ke nashshe utarte hain

KHuda samjhe ye kya sayyaad o gulchin zulm karte hain

gulon ko toDte hain bulbulon ke par katarte hain

daya dam naza mein go aap ne par ruh chal nikli

kisi ke rokne se jaane wale kab Thaharte hain

zara rahne do apne dar pe hum KHana-ba-doshon ko

musafir jis jagah aaram pate hain Thaharte hain

na aa jaya karo aghyar ki ulfat jatane mein

wo tum par kyun bhala marne lage faqon se marte hain

har ek mausam mein kisht-e-arzu sarsabz rahti hai

taraddud ghair ko hoga yahan to chain karte hain

ye joDa kholna bhi hech se KHali nahin un ka

ulajh jata hai dil jab baal shanon par bikharte hain

samajh lena tumhaara ai raqibo kuchh nahin mushkil

KHuda jaane ye kis ka KHauf hai hum kis se Darte hain

takalluf ke ye mani hain samajh lo be-kahe dil ki

maza kya jab hamin ne ye kaha tum se ki marte hain