یہ وقت پر فریب یوں گزرے ہے تیز گام

یہ وقت پر فریب یوں گزرے ہے تیز گام

دن کی ہٹائی پنی تو اندر سے نکلی شام

ایمان و اتحاد کی تنظیم کھو گئی

اب کھانچہ جیک پوا چلاتا ہے یہ نظام

جی چاہتا ہے بوریا باندھیں نکل پڑیں

اپنا تو تیرے شہر میں جینا ہوا حرام

خود کو غریب مان کے تقدیر جان کے

دن رات پس رہے ہیں دل و جان سے عوام

جمہوریت کی ریل کو پٹری پہ لائیں گے

ستر برس سے بس یہی بھاشن ہیں صبح و شام

میرا کراچی پھر ہے کسی سامری کے ہاتھ

اک بل میں پھنس گئی ہیں کہیں گردشیں تمام

جس کو بھی دیکھتے ہیں وہ کھویا ہوا سا ہے

جیسے مقیم اور کہیں ہے کہیں قیام

اسکول خون چوسنے والی مشین ہیں

بھیجو گلاب گوں تو پلٹتا ہے زرد فام

ڈاٹا کی اس صدی پہ کبھی غور تو کرو

انسان بک رہا ہے یہاں کوڑیوں کے دام