ye waqt raushni ka muKHtasar hai

ye vaqt raushnī kā muḳhtasar hai

abhī sūraj tulū-e-muntazar hai

shahādat lafz kī dushvār-tar hai

kitāboñ meñ bahut zer-o-zabar hai

abhī khulne ko hai dar āsmāñ kā

abhī iz.hār kā pyāsā bashar hai

ye duniyā ek lamhe kā tamāsha

na jaane dūsrā lamha kidhar hai

jo dekhā hai vo sab kuchh hai hamārā

jo an-dekhā hai vo ummīd bhar hai

maiñ ḳhud ḳhāshāk-e-girvīda huuñ varna

mire hāthoñ meñ tinkā shaah par hai

phir is ke ba.ad bas hairāniyāñ haiñ

ḳhabar vaalā bhī ḳhāsā be-ḳhabar hai

mirā na.ara hai jañgal aag jaisā

mirā kalma shikasta bāl-o-par hai

zabāñ merī siyāsat chāTtī hai

ki is kā zā.iqa shīr-o-shakar hai

ye andhī pyaas kā mausam hai 'ahmad'

samundar raushnī kā be-asar hai

ye waqt raushni ka muKHtasar hai

abhi suraj tulu-e-muntazar hai

shahadat lafz ki dushwar-tar hai

kitabon mein bahut zer-o-zabar hai

abhi khulne ko hai dar aasman ka

abhi izhaar ka pyasa bashar hai

ye duniya ek lamhe ka tamasha

na jaane dusra lamha kidhar hai

jo dekha hai wo sab kuchh hai hamara

jo an-dekha hai wo ummid bhar hai

main KHud KHashak-e-girwida hun warna

mere hathon mein tinka shah par hai

phir is ke baad bas hairaniyan hain

KHabar wala bhi KHasa be-KHabar hai

mera nara hai jangal aag jaisa

mera kalma shikasta baal-o-par hai

zaban meri siyasat chaTti hai

ki is ka zaiqa shir-o-shakar hai

ye andhi pyas ka mausam hai 'ahmad'

samundar raushni ka be-asar hai