یہ زخم ہائے غم محبت یہ داغ ہائے غم زمانہ

یہ زخم ہائے غم محبت یہ داغ ہائے غم زمانہ

انہیں چراغوں کے دم سے روشن رہا ہے دل کا غریب خانہ

وہ فتنے جاگ اٹھے آنکھ ملتے وہ زلزلے لے رہے ہیں کروٹ

ذرا تصور میں آ گیا تھا خیال تعمیر آشیانہ

کبھی شکایت کہ بے وفا ہوں کبھی خفا عرض مدعا پر

مرے ستانے کو مل ہی جاتا ہے آپ کو کچھ نہ کچھ بہانہ

انہیں پہ ہے لطف برق و باراں کرم انہیں پر ہے باغباں کا

مرے نشیمن کے چار تنکے ہیں مرکز گردش زمانہ

یہ کہنہ سالی میں بدرؔ تم کو غزل سرائی کی خوب سوجھی

نہ اب وہ رنگینیٔ تخیل نہ اب وہ جذبات شاعرانہ