ye zamin achchhi lagi ye aasman achchha laga

ye zamīñ achchhī lagī ye āsmāñ achchhā lagā

saath jab tak tum rahe saarā jahāñ achchhā lagā

thī havāoñ meñ mahak us ke badan kī har taraf

fasl-e-gul achchhī lagī daur-e-ḳhizāñ achchhā lagā

us se milne kī lalak meñ jī rahā huuñ aaj tak

varna be-maqsad safar tanhā kahāñ achchhā lagā

jo kahā us ne sarāsar jhuuT thā sach hai magar

mutma.in maiñ thā ki andāz-e-bayāñ achchhā lagā

muḳhtalif mulkoñ se qaumeñ aa.iiñ aa kar bas ga.iiñ

kuchh to hai hī jo unheñ hindostāñ achchhā lagā

shaiḳh masjid meñ barahman dair meñ maiñ mai-kade

sub.h tak sab the vahāñ jis ko jahāñ achchhā lagā

dosto sach sach batānā ḳhaak to maiñ ho gayā

kyā tumheñ ghar se mire uThtā dhuāñ achchhā lagā

dushman-e-jāñ us ko kahtā hai to koī bevafā

jaane kyoñ 'gulshan' mujhe vo jān-e-jāñ achchhā lagā

ye zamin achchhi lagi ye aasman achchha laga

sath jab tak tum rahe sara jahan achchha laga

thi hawaon mein mahak us ke badan ki har taraf

fasl-e-gul achchhi lagi daur-e-KHizan achchha laga

us se milne ki lalak mein ji raha hun aaj tak

warna be-maqsad safar tanha kahan achchha laga

jo kaha us ne sarasar jhuT tha sach hai magar

mutmain main tha ki andaz-e-bayan achchha laga

muKHtalif mulkon se qaumen aain aa kar bas gain

kuchh to hai hi jo unhen hindostan achchha laga

shaiKH masjid mein barahman dair mein main mai-kade

subh tak sab the wahan jis ko jahan achchha laga

dosto sach sach batana KHak to main ho gaya

kya tumhein ghar se mere uThta dhuan achchha laga

dushman-e-jaan us ko kahta hai to koi bewafa

jaane kyon 'gulshan' mujhe wo jaan-e-jaan achchha laga