ye zamin chand sitaron ka badal kaise ho

ye zamīñ chāñd sitāroñ kā badal kaise ho

sochtā maiñ bhī bahut kuchh huuñ amal kaise ho

sūrat-e-hāl badal jaatī hai ik lamhe meñ

aadmī apne irādoñ meñ aTal kaise ho

kin daraḳhtoñ se lagā rakkhī hai ummīd-e-samar

shāḳh hī jab na ho sarsabz to phal kaise ho

sochte kuchh haiñ amal kuchh hai natīja kuchh hai

aisī sūrat meñ koī mas.ala hal kaise ho

dard se koī ilāqa na ta.alluq ġham se

sirf lafzoñ ke baratne se ġhazal kaise ho

har mulāqāt adhūrī rahī is uljhan meñ

ya.anī iz.hār-e-mohabbat meñ pahal kaise ho

mere mahbūb kā urdu se hai rishta kam-kam

mainūñ aañdī na.iiñ punjabi te gal kaise ho

ye zamin chand sitaron ka badal kaise ho

sochta main bhi bahut kuchh hun amal kaise ho

surat-e-haal badal jati hai ek lamhe mein

aadmi apne iradon mein aTal kaise ho

kin daraKHton se laga rakkhi hai ummid-e-samar

shaKH hi jab na ho sarsabz to phal kaise ho

sochte kuchh hain amal kuchh hai natija kuchh hai

aisi surat mein koi masala hal kaise ho

dard se koi ilaqa na talluq gham se

sirf lafzon ke baratne se ghazal kaise ho

har mulaqat adhuri rahi is uljhan mein

yani izhaar-e-mohabbat mein pahal kaise ho

mere mahbub ka urdu se hai rishta kam-kam

mainun aandi nain punjabi te gal kaise ho