ye zamin jo saqafat mein zarKHez thi isko kya ho gaya

ye zamīñ jo saqāfat meñ zarḳhez thī is ko kyā ho gayā

is kī sharh-e-numū to bahut tez thī is ko kyā ho gayā

ab surāhī ke dāman meñ kuchh bhī nahīñ ḳhāmushī ke sivā

merī tārīḳh logoñ se labrez thī is ko kyā ho gayā

terī duniyā ko nazdīk se dekh kar ḳhud pe afsos hai

is kī tasvīr kitnī dil-āvez thī is ko kyā ho gayā

tum ne bārūd kī thailiyoñ meñ janā thā na.ī nasl ko

aaj kahte ho ye amn-angez thī is ko kyā ho gayā

us kī ḳhāk-e-shifā se jilā pā ga.e kitne ruumī yahāñ

ye zamīñ apnī shaukat meñ tabrez thī is ko kyā ho gayā

tujh badan ke manāzir kī nazzārgī hai ḳhizāñ-yāfta

ye siyāhat baḌī lutf-angez thī is ko kyā ho gayā

pakke rangoñ meñ rangī huī aurteñ kitnī nāyāb haiñ

ye mohabbat jo mashshāq rangrez thī is ko kyā ho gayā

zindagī apnī tarsīl kā marhala tai nahīñ kar sakī

varna raftār meñ maut se tez thī is ko kyā ho gayā

peḌ kī chhāl bhī kāTne kā jatan kar nahīñ pā.egī

merī talvār fitrat meñ ḳhūñ-rez thī is ko kyā ho gayā

shaḳhsiyat ke tanāsub meñ bechārgī baḌh rahī hai 'munīr'

ye kahānī bahut hī junūñ-ḳhez thī is ko kyā ho gayā

ye zamin jo saqafat mein zarKHez thi is ko kya ho gaya

is ki sharh-e-numu to bahut tez thi is ko kya ho gaya

ab surahi ke daman mein kuchh bhi nahin KHamushi ke siwa

meri tariKH logon se labrez thi is ko kya ho gaya

teri duniya ko nazdik se dekh kar KHud pe afsos hai

is ki taswir kitni dil-awez thi is ko kya ho gaya

tum ne barud ki thailiyon mein jana tha nai nasl ko

aaj kahte ho ye amn-angez thi is ko kya ho gaya

us ki KHak-e-shifa se jila pa gae kitne rumi yahan

ye zamin apni shaukat mein tabrez thi is ko kya ho gaya

tujh badan ke manazir ki nazzargi hai KHizan-yafta

ye siyahat baDi lutf-angez thi is ko kya ho gaya

pakke rangon mein rangi hui aurten kitni nayab hain

ye mohabbat jo mashshaq rangrez thi is ko kya ho gaya

zindagi apni tarsil ka marhala tai nahin kar saki

warna raftar mein maut se tez thi is ko kya ho gaya

peD ki chhaal bhi kaTne ka jatan kar nahin paegi

meri talwar fitrat mein KHun-rez thi is ko kya ho gaya

shaKHsiyat ke tanasub mein bechaargi baDh rahi hai 'munir'

ye kahani bahut hi junun-KHez thi is ko kya ho gaya